(ភ្នំពេញ)៖ រយៈពេល១៤ថ្ងៃ ចាប់ពីម៉ោងសូន្យនាទី ថ្ងៃទី១៩ ខែមេសា ឆ្នាំ២០២១ រហូតដល់ថ្ងៃទី០២ ខែឧសភា ឆ្នាំ២០២១ ផ្សារកណ្តាល រាជធានីភ្នំពេញ នឹងត្រូវផ្អាកដំណើរការជាបណ្តោះអាសន្នក្រោយរកឃើញអាជីវករឆ្លងកូវីដជាបន្តបន្ទាប់ ដើម្បីបង្ការនិងទប់ស្កាត់ការឆ្លងរីករាលដាលវីរុសកូវីដ-១៩។ 

រដ្ឋបាលខណ្ឌដូនពេញ បានចេញសេចក្តីជូនដំណឹង នៅថ្ងៃទី២០ ខែមេសា ឆ្នាំ២០២១ ថា ដោយស្ថានភាពនៃការរីករាលដាលនៃជម្ងឺកូវីដ១៩ ក្នុងរយៈពេលប៉ុន្មានថ្ងៃចុងក្រោយនេះ មានបងប្អូនអាជីវករ និងប្រជាពលរដ្ឋបានឆ្លងវីរុសកូវីដ១៩ យ៉ាងឆាប់រហ័សគួរឱ្យបារម្ភ អាជ្ញាធរផ្អាកដំណើរការជាបណ្តោះអាសន្នផ្សារកណ្តាល ក្នុងសង្កាត់ផ្សារកណ្តាលទី១ ។

ទន្ទឹមនឹងនេះ អាជ្ញាធរខណ្ឌដូនពេញ បានអំពាវនាវដល់បងប្អូនអាជីវករ សន្តិសុខ បុគ្គលិក កម្មករ បម្រើការងារក្នុងផ្សារ និងក្រុមគ្រួសារអាជីវករពាក់ព័ន្ធ ព្រមទាំងប្រជាពលរដ្ឋដែលកន្លងមកធ្លាប់បានចេញ-ចូល ផ្សារខាងលើនៅថ្ងៃទី០៥ ខែមេសា ដល់ថ្ងៃទី១៩ ខែមេសា ឆ្នាំ២០២១ បើមានអការៈក្តៅខ្លួន ក្អក ពិបាកដកដង្ហើម ហើយមានការសង្ស័យថាឆ្លងមេរោគកូវីដ១៩ សូមអញ្ជើញមកយកសំណាកតេស្តរកមេរោគកូវីដ-១៩ ជាបន្ទាន់នៅវិទ្យាល័យបាក់ទូកនិងវិទ្យាល័យបឹងត្របែក ព្រមទាំងអនុវត្តវិធានចត្តាឡីស័ក ស្របតាមការណែនាំរបស់ក្រសួងសុខាភិបាល ឱ្យបានត្រឹមត្រូវបំផុត៕